باركا

عبدالحنين العيادي

عبد الحنين العيادي

باركا ما تضحكوا على ولاد الشعب

باركا ما تعطونا التبن وتاخدوا الحب

باركا من التلاعب بالمال العام والنهب

واش مزال ما بغى يعمر ليكم الجيب؟

 شنو زعما كتبيعوا القرد وتضحكوا على اللي شراه

    ولى انتما هما اصحاب القيمة والجاه

     ما تنساوش بلي الغراب بغا يطعم ولدو عماه

    ولكن منخافوش مدام عندنا الله

قريب النهار اللي غادي تبان في الحقيقة

وتحول الصحراء من الرمال للحديقة

مدام عندنا مبادئ  واديولوجية عريقة

حيث الأمر واضح بمعطيات وتفاصيل دقيقة

    اليوم القمع ما بقاش كيهمنا

    والسيمي والبلير عليه تعودنا

    والإعتقال طاقة كتزيد تشحنا

    وسياسة غادي نديروا فراس طلعتنا

الشعب اليوم وعى بعد ما فكر واختار

طريق واضحة ما فيها شوك ولا غبار

طريق الخلاص والانتقام ورد الاعتبار

كلشي واضح وكيزيد يبان نهار بعد نهار

   عيينا من التخلف والفقر والامية

   عيينا من الوعود الكاذبة بدون مصداقية

    واش الحل زعما هو التنمية البشرية

    ولا الدستور لكيربط المحاسبة بالمسؤولية

اللي ما عندو سيدو عندو لالاه صبح عليها الحال

والزبونية والمحسوبية تقضى له الآجال

والطاعة والولاء تبدلت بكلمة ارحل

والمد الثوري فالنضال والصمود جدد الامال

   راجعوا راسكم واصحو الأخطاء

   الشعب كره كثرة الضرائب وثقل الأعباء

   والإنسان راه قيمة ماشي سلع وأشياء

وإما المعقول، ولا الزمار كامل يولي أشلاء

تعليقات

    1. لو كنت تفهمين معنى الكلام الممتد من مظفر النواب الى عبد الحنين ليراقص بطش النظام مافهمت التعبير عن المرحلة في خربشة قلم وهدا ينم عن تعبير رديء يأطره فكرك القاصر و لدا نقول لأمثالك ارحل